Süleyman Mehralı oğlu Süleymanov
1946-cı ildə Kəlbəcər rayonunun Ağcakənd kəndində sənətkar ailəsində anadan olub. Atası Mehralı kişi qeyri-adi istedada malik şəxs idi. Dəlləklik, dərzilik, sazbəndlik, türkəçarəlik kimi bir çox sənətləri bilməklə yanaşı, həm də gözəl nağıl ustası idi. Uzun qış gecələrində kəndin camaatı Mehralı kişinin evinə toplaşar, onun maraqlı söhbətlərinə qulaq asardılar.
Süleyman Mehralı kişinin ikinci oğludur. İncəsənətə, şeirə maraq ona atasından keçmişdir. Hərbi xidmətdə olduğu zaman hərbi hissədə bədii özfəaliyyət kollektivi yaradıb maraqlı səhnələr təşkil etməklə özünün sənətə bağlılığını bir daha göstərmişdir. Əsgərliyini başa vurduqdan sonra Ağcakənd kəndində mədəniyyət evinin müdiri təyin olunur. “Kilimarası”, “Maral oyunu”nu kimi oyunların yaşadılıb bu günə çatdırılmasında onun böyük xidmətləri olmuşdur. Ona qədər atası Mehralı kişi bu sənəti yaşatmış, həm Ağcakənddə, həm də qonşu kəndlərdə toylarda həmin oyunları nümayiş etdirmişdir. Mehralı kişi yaşlaşandan sonra həmin sənəti davam etdirməyi oğlu Süleymana vəsiyyət edir. Məhz onun sayəsində vaxtilə Azərbaycanın müxtəlif bölgələrində oynanılan “Kilimarası”, “Maral oyunu” bu gün ancaq Ağcakənddə qorunub saxlanılır. O, bu oyunları yaşatmaqla yanaşı, onları təkmilləşdirmiş, həmin oyunları yaşadacaq yeni nəsil yetişdirmişdir.
Əlaqəli nümunələr
Günün nümunəsi
Miniatür
İslam Şərqinin incəsənəti tarixində Azərbaycan miniatür sənəti üslubu, bədii sənətkarlıq xüsusiyyətləri etibarilə xüsusi əhəmiyyət kəsb edir. Miniatür sənəti əlyazma kitablarının bədii tərtibatında mühüm rol oynayır. Bəzən bu sənət nümunəsi bədii mətni əks etdirməkdən asılı olmayaraq müstəqil səciyyə daşıyırdı. Azərbaycan kitab miniatürlərinin qorunub-saxlanmış ilk nümunələri XII-XII...