Aşıq Nemət
Qasımov Nemət Yusif oğlu 1972-ci il iyulun 27-də Gədəbəy rayonunun Kiçik-Qaramurad kəndində ziyalı ailəsində anadan olub. 1979-cu ildə həmin kənddə orta məktəbin 1-ci sinfinə daxil olub, 1989-cu ildə 10 illik təhsili əla qiymətlərlə bitirib. Sazla ilk çıxışını 1-ci sinfə getdiyi il, 1979-cu ildə orta məktəbdə keçirilən bayram tədbirində edib. İsfəndiyar Rüstəmovun rəhbərliyi altında keçirilən “Gədəbəyin yazı, aşığın sazı” yaz bayramlarında dəfələrlə iştirak edib. Gəncəbasar bölgəsi üzrə keçirilən “Telli saz” müsabiqəsinin qalibi olub. 4-cü sinifdə oxuyanda, demək olar ki, yaşının imkanı daxilində elə bir aşıq olmayıb ki, onun məclisində iştirak etməsin və ya şəxsən özü ilə görüşüb sənət sirləri haqqında bilgilərini artırmasın.
1990-cı ildə Azərbaycan Dövlət Mədəniyyət və İncəsənət Universitetinin “Rejissorluq” fakültəsinə daxil olub.
1992-1994-cü illərdə ADMİU-nun “Tədris teatrı” şöbəsində musiqi rejissoru işləyib, 1992-ci ilin sentyabrında Qara Qarayev adına 8 saylı musiqi məktəbində Bakıda ilk dəfə olaraq saz sinfini açıb. Çalışdığı ilk gündən bu günə qədər keçirilən bütün müsabiqələrdə onun şagirdləri həmişə I yerə layiq görülüb. Sazı ləyaqətlə təmsil edən şagirdlərinin sayı 600-dən artıqdır. 1995-ci ildə ali təhsili tam bitirdikdən sonra AMEA-nın Folklor İnstitutunda elmi işçi kimi elmi fəaliyyətə başlayıb.
1996-cı ildə Respublika üzrə keçirilən “İstedad axtarırıq” müsabiqəsinin, 2002-ci ilin mayında Türkiyədə keçirilən (20-26 may) “Uluslararası Silifke kültür heftesi” aşıq müsabiqəsinin, 2004-cü il 28 may Respublika Günü şərəfinə keçirilən “I Aşıqlar müsabiqəsi” nin, 2005-ci ildə Türkiyənin Tarsus şəhərində keçirilən “Şəlalə şeir axşamları” müsabiqəsinin qalibi olub. 2010-cu ildə Cənubi Koreyanın Yeosu şəhərində keçirilən "Dünyaya sülh gərək" beynəlxalq müsabiqənin qalibi olub. Dünya İncəsənət və Musiqi Ustası diplomunu və kubokunu qazanıb.
2009-cu ildən başlayaraq YUNESKO-nun tədbirlərində aşıq sənətini mütəmadi olaraq təmsil edir. YUNESKO-ya təqdim edilən aşıq sənəti haqqında filmin əsas aparıcısıdır. YUNESKO tərəfindən Nemət Qasımlının sənət fəaliyyəti ilə bağlı 52 dəqiqəlik sənədli film çəkilib.
Əlaqəli nümunələr
Günün nümunəsi
Miniatür
İslam Şərqinin incəsənəti tarixində Azərbaycan miniatür sənəti üslubu, bədii sənətkarlıq xüsusiyyətləri etibarilə xüsusi əhəmiyyət kəsb edir. Miniatür sənəti əlyazma kitablarının bədii tərtibatında mühüm rol oynayır. Bəzən bu sənət nümunəsi bədii mətni əks etdirməkdən asılı olmayaraq müstəqil səciyyə daşıyırdı. Azərbaycan kitab miniatürlərinin qorunub-saxlanmış ilk nümunələri XII-XII...