AZƏRBAYCAN QEYRİ-MADDİ MƏDƏNİ İRS NÜMUNƏLƏRİNİN DÖVLƏT REYESTRİ

Ənənəvi Respublika Folklor Festivalına yekun vuruldu

Noyabr 02, 2019 11:32

Noyabrın 1-də Azərbaycan Dövlət Akademik Musiqili Teatrında Ənənəvi Respublika Folklor Festivalının bağlanış mərasimi keçirildi.
 
Tədbirdə çıxış edən Mədəniyyət naziri Əbülfəs Qarayev bildirdi ki, festivalda 80-dən çox kollektiv iştirak edib. Bu kollektivlər sırasından ən yaxşıları seçilərək bu gün çıxış edəcəklər.
 
Ölkəmizdə xalq yaradıcılığının inkişafına böyük əhəmiyyət verildiyini diqqətə çatdıran nazir qeyd etdi ki, bu qayğı Azərbaycanda yeni formalaşan yaradıcılıq sənayesinin inkişafı baxımından olduqca vacib əhəmiyyət kəsb edir: “Sevindirici haldır ki, respublikamızın regionlarında xalq yaradıcılığı sahəsində çalışan kollektivlərin sayı artır. Ötən il 3 xalq yaradıcılığı kollektivi Xalq teatrı adına layiq görüldü. Bu o deməkdir ki, yaradıcılıq axtarışları davam edir. Həmçinin vurğulamaq istərdim ki, Ənənəvi Respublika Folklor Festivalı gələcəkdə də davam etdiriləcək. Bilirsiniz ki, Masallıda hər il beynəlxalq folklor festivalı keçirilir. Gələn il bu festivalın miqyasını daha da genişləndirmək niyyətindəyik. Məqsədimiz Azərbaycan xalqının əsrlər boyu yaratdığı ənənələri, xalq yaradıcılıq növlərini qoruyaraq gələcək nəsillərə ötürülməsini təmin etməkdir. Festivalın işinə ölkənin bütün bölgələrindən kollektivlər qoşularaq sübut etdilər ki, xalq yaradıcılığı ənənələrinin gələcəyi parlaqdır”.
 
Nazir festivalda ölkəmizdə yaşayan azsaylı xalqların da adət-ənənələrinin təmsil olunmasını yüksək qiymətləndirdi. Bildirdi ki, yaşlı nəsillə yanaşı, kollektivlərdə uşaq və gənclər də var. Onlar yaşlı nəsildən öyrənərək bu ənənələri gələcəyə aparırlar.
 
Əbülfəs Qarayev Prezident İlham Əliyev və Birinci vitse-prezident Mehriban xanım Əliyevanın xalq yaradıcılığının inkişafına böyük önəm verdiklərini dedi: Mədəniyyət Nazirliyinin qarşısında müvafiq tapşırıq və vəzifələr qoyulub. Biz xalq yaradıcılığı ilə bağlı yeni layihə və proqramlar hazırlayacağıq”.
 
Nazir çıxışının sonunda festivalın təşkilində əməyi keçənlərə təşəkkürünü bildirdi. Dedi ki, qədim dövrlərdən qorunan ənənələrin gələcəyə aparılması milli irsimizin qorunmasına xidmət edir.
 
Sonra festivalın qalib kollektivlərinə diplomlar təqdim edildi. Birinci yerin qalibinə ("Xəmsə" xalq kollektivi, Gəncə) diplomu nazir Əbülfəs Qarayev, ikinci yerin sahibinə (“Mel" kollektivi, Qusar) nazir müavini Rafiq Bayramov, III mükafatın qalibinə isə ("Zopu-zopu" kollektivi) Xalq yaradıcılığı və mədəni marşrutların inkişafı şöbəsinin müdiri Günel Aslanova təqdim etdi.
 
Festivalda həmçinin ozan-aşıq sənətinin ən uğurlu nümayişi, multikultural dəyərlərin ən uğurlu nümayişlərinə görə fərqlənən kollektivlərə fəxri fərmanlar təqdim edildi.
 
Festivalın bağlanışı kollektivlərin konsert proqramı ilə davam etdi.
 
Qeyd edək ki, respublikamızın paytaxt və regionlarında fəaliyyət göstərən folklor kollektivlərinə dəstək göstərilməsi məqsədilə bu ilin sentyabr-oktyabr aylarında Ənənəvi Respublika Folklor Festivalının seçim mərhələsi keçirilib. Həmin mərhələ çərçivəsində istedadlı uşaq folklor kollektivlərinin aşkar edilməsi, onlara dəstək göstərilməsi üçün müsabiqə təşkil edilib. Kollektivlərin məharətini nazirliyin əməkdaşları, həmçinin respublikanın tanınmış incəsənət nümayəndələrindən ibarət münsiflər heyəti müəyyənləşdirib.