"Qorqud" folklor ansamblı
“Qorqud” folklor ansamblı “İrs” folklor ansamblı adı ilə 1976-cı ildə folklor tədqiqatçısı, musiqişünas Sidqi Mustafayev və mərhum bəstəkarımız Rəşid Nəsiboğlu tərəfindən yaradılmışdır. 1981-ci ildə Respublikanın mədəniyyət, incəsənət və elm xadimlərinin iştirakı ilə keçirilən baxışda ansamblın gördüyü işlər yüksək qiymətləndirilmiş və ansambla dövlət statusu verilmişdir. “İrs” folklor ansamblı 2002-ci ildən Azərbaycan Milli Elmlər Akademiyası Folklor İnstitutunun nəzdində fəaliyyət göstərmişdir. AMEA Rəyasət Heyətinin 24 may 2017-ci il tarixli qərarı ilə ansamblın adı dəyişdirilərək “Qorqud” folklor ansamblı adlandırılmışdır.
Azərbaycan Respublikasının xalq artisti Mələkxanım Əyyubova (1980-cı ildən 1985-ci ilədək "İrs" folklor ansamblının solisti olmuşdur), əməkdar artist Əbülfət Nəzərli, Aşıq Nemət Miskinli, Aşıq Fəzail Miskinli və başqaları bu ansamblın əməkdaşı olmuşlar. Hazırda Şəbnəm Tapdıq, Solmaz Kosayeva, Aşur Adıgözəlov, Novruz Novruzlu, Həlimət Məmmədova və başqa tanınmış sənət adamlarının cəmləşdiyi ansambla respublikanın Əməkdar artisti Nuriyyə Hüseynova rəhbərlik edir.
Ansambl musiqi folklorumuzun və ümumən musiqi mədəniyyətimizin dünyada tanıdılması və təbliği istiqamətində çoxsaylı uğurlar əldə etmiş, İtaliya, İsveç, Rusiya, Ukrayna, Avstraliya, Fransa, Türkiyə, İran və digər ölkələrdə keçirilən beynəlxalq festivallardan vətənə medallar və fəxri diplomlarla qayıtmışdır.
Ansamblın fəaliyyətində başlıca məqsəd yaddaşlarda yaşayan qədim el havalarını, xalq musiqisi örnəklərini, aşıq yaradıcılığı nümunələrini, xalq oyunları və meydan tamaşalarını toplamaq, rekonstruksiya etmək və gələcək nəsillərə çatdırmaqdır. Ansambl Azərbaycan musiqi folklorunu praktik olaraq inkişaf etdirməklə yanaşı, qədim, artıq unudulmuş xalq çalğı alətlərinin də bərpası istiqamətində işlər görür. Öz uzunmüddətli fəaliyyəti dövründə ansambl Azərbaycan xalqının musiqi folklorunun dəyərli nümunələrindən olan “Almanı alma, gəlin”, “Əylən, gəlin”, “Ruhani”, “Azaflı dübeytisi”, muğamlardan “Nəva”, meydan tamaşalarından “Kosa-Kosa”, “Toyuq aparan”, “Qaravəlli” və s. bərpa etmişdir.